You are here
Home > Prachar News > તંત્રી સ્થાનેથી… પ્લાસ્ટીક પ્રદુષણ માનવ જીવન માટે અણુબોમ્બ કરતા પણ ખતરનાક – નાના વેપારીઓ પાસેથી પ્લાસ્ટીક થેલીઓ જપ્ત કરવાને બદલે પ્લાસ્ટીક ફેક્ટરીઓજ સીલ કરવી જોઈએ

તંત્રી સ્થાનેથી… પ્લાસ્ટીક પ્રદુષણ માનવ જીવન માટે અણુબોમ્બ કરતા પણ ખતરનાક – નાના વેપારીઓ પાસેથી પ્લાસ્ટીક થેલીઓ જપ્ત કરવાને બદલે પ્લાસ્ટીક ફેક્ટરીઓજ સીલ કરવી જોઈએ

તંત્રી સ્થાનેથી…
પ્લાસ્ટીક પ્રદુષણ માનવ જીવન માટે અણુબોમ્બ કરતા પણ ખતરનાક
નાના વેપારીઓ પાસેથી પ્લાસ્ટીક થેલીઓ જપ્ત કરવાને
બદલે પ્લાસ્ટીક ફેક્ટરીઓજ સીલ કરવી જોઈએ

માનવી જન્મે ત્યારે તેનુ મૃત્યુ નિશ્ચિત છે. પરંતુ પ્લાસ્ટીકનો જન્મ થાય, ઉત્પાદન થાય ત્યારે તે અમર બની જાય છે. પ્લાસ્ટીક અમર છે. કાળા માથાના માનવીએ પ્લાસ્ટીકની શોધ કરી છે, જે પ્લાસ્ટીક અત્યારે કાળા માથાના માનવીના જીવન ઉપર ભારે પડી રહ્યુ છે. પ્લાસ્ટીક પ્રદુષણ વૈશ્વીક સમસ્યા બની ગયુ છે. પ્લાસ્ટીકનુ આયુષ્ય ૫૦૦૦ વર્ષ કરતા પણ વધારે છે. એક અહેવાલ પ્રમાણે ભારતમાં વ્યક્તિદીઠ વાર્ષિક આઠ કીલો પ્લાસ્ટીકનો ઉપયોગ થાય છે. ભારતની વસ્તી પ્રમાણે ગણીએ તો ૧૦૦૦ કરોડ કીલો કરતા પણ વધારે દર  વર્ષે પ્લાસ્ટીકનો ઉપયોગ થાય છે. રોજની ૧૬ થી ૧૭ હજાર ટન પ્લાસ્ટીક કચરો પેદા થાય છે. જેમાંથી ૬૦ ટકા પ્લાસ્ટીક વેસ્ટ રીસાયકલ થાય છે. ૪૦ ટકા પ્લાસ્ટીક કચરો ખુલ્લામાં ફેકાય છે, જે વાતાવરણમાં ભળે છે અને પ્રદુષણ ફેલાય છે. ભારતમાં પ્લાસ્ટીકના નિકાલ માટે કોઈ સુવ્યવસ્થિત આયોજન નથી. જેના કારણે રખડતી ગાયોના પેટમાંથી પ્લાસ્ટીક નીકળે છે. પ્લાસ્ટીક સળગાવવામાં આવે તો વાયુ પ્રદુષણ થાય છે. જે પ્રાણી સૃષ્ટી માટે નુકશાનકારક છે. પ્લાસ્ટીકનો ધંધો હજ્જારો કરોડનો હોવાથી સરકાર આ વ્યવસાય ઉપર પ્રતિબંધ લાવી શકતી નથી. સરકારે એ સમજવુ જોઈએ કે આવક કરતા દેશની જનતાનુ સ્વાસ્થ્ય વધારે મહત્વનુ છે.
૫ મી જૂન વિશ્વ પર્યાવરણ દિવસે ગ્લોબલ વોર્મીંગ સામે પર્યાવરણની રક્ષા માટે પરિસંવાદો થયા. જેમાં પ્લાસ્ટીક પ્રદુષણ મુખ્ય વિષય બની રહ્યો. સંસ્થાઓએ પર્યાવરણ જાગૃતિ માટે રેલીઓ કાઢી એમાંય ખાસ પ્લાસ્ટીકનો વપરાશ નહી કરવા માટે લોકજાગૃતિના કાર્યક્રમો થયા. કેટલીક સંસ્થાઓ વિશ્વ પર્યાવરણ દિન નિમિત્તે પખવાડીયા ઉજવે છે. પખવાડીયા બાદ ફરી વિશ્વ પર્યાવરણ દિન ભુલાશે અને ફરી પાછુ જેમનુ તેમ પ્લાસ્ટીક પ્રદુષણ ચાલુ થઈ જશે. પ્લાસ્ટીક પ્રદુષણ વધારવા માટે જો કોઈ જવાબદાર હોય તો પ્લાસ્ટીક થેલીઓનો વપરાશ, પ્લાસ્ટીક પાઉચનો વપરાશ. વિશ્વના એવા કેટલાક દેશ છેકે પ્લાસ્ટીક પ્રદુષણ અટકાવવા દેશમાં પ્લાસ્ટીક ઉત્પાદન ઉપર પ્રતિબંધ મુક્યો છે. પરંતુ શુ એ ભારત માટે શક્ય છે. દેશમાં વસ્તી વિસ્ફોટજ એટલો બધો છેકે સરકારને માનવ જીંદગીની કે માનવ સ્વાસ્થ્યની કંઈ પડી નથી. પ્લાસ્ટીક થેલીઓ, પેકીંગ અને વિવિધ પ્રોડક્ટમાં પ્લાસ્ટીક પાઉચના વપરાશથી વધારેમાં વધારે પ્લાસ્ટીક પ્રદુષણ ફેલાય છે. વિશ્વ પર્યાવરણ દિને મહાનગરપાલિકાઓ અને પાલિકાઓ દ્વારા પ્લાસ્ટીક થેલીઓના વપરાશ ઉપર પ્રતિબંધ મુકી ચેકીંગનુ નાટક હાથ ધરાયુ. જેમાં નાના વેપારીઓ, શાકભાજીની લારીઓ વાળા પાસેથી પ્લાસ્ટીકની થેલીઓ જપ્ત કરી વિસનગર પાલિકા દ્વારા વિશ્વ પર્યાવરણ દિન ઉજવણી નિમિત્તે ૨૦૦ કીલો પ્લાસ્ટીકની થેલીઓ જપ્ત કરી. તેમાં નુકશાન નાના વેપારીઓને થયુ. ખરેખર સરકાર પ્લાસ્ટીક પ્રદુષણથી ચીંતીત હોય તો પ્લાસ્ટીક થેલીઓ અને પાઉચનુ ઉત્પાદન કરતી ફેક્ટરીઓજ સીલ કરવી જોઈએ. પેપર પેકીંગને મહત્વ આપવુ જોઈએ. સરકાર જો આટલુ કરે તો પણ દેશમાં ૫૦ ટકા પ્લાસ્ટીક પોલ્યુશન ઓછુ થઈ શકે તેમ છે. માનવ જીવન માટે પ્લાસ્ટીક પ્રદુષણ એ એક અણુબોમ્બ કરતા પણ ખતરનાક છે. વિશ્વ પર્યાવરણ દિને પ્લાસ્ટીક પ્રદુષણ માટે ચીંતન શીબીરો થશે. સેમિનાર થશે, વિશ્વના દેશો વચ્ચે ચર્ચાઓ થશે. પરંતુ તેને અટકાવવા કોઈ નક્કર અને કડક પગલા ભરાશે નહી. તેના માટે તો લોકોએજ જાગૃત થવુ પડશે. જીવનમાં ઓછામાં ઓછા પ્લાસ્ટીકનો વપરાશ કરી સમજદારીપૂર્વક ઉપયોગ કરવો પડશે. આપણે આપણા પુત્રો, પૌત્રો, આવનારી પેઢી માટે બચત કરીએ છીએ, પરંતુ આવનારી પેઢી પ્રદુષણનો ભોગ ન બને. જે પ્રદુષણથી ગંભીર બીમારીઓનો ભોગ ન બને, તે માટે પ્લાસ્ટીકનો ઓછો વપરાશ થાય તેવુ વર્તન કરતા નથી. આવનારી પેઢીને બચાવવી હોય તો જીવનમાં ઓછામાં ઓછો પ્લાસ્ટીકનો વપરાશ થાય તેવી પ્રતિજ્ઞા લેવી પડશે.

Leave a Reply

Top