Select Page

વિસનગરમાં જમીનની જંત્રીના દર વધારવા ખેડૂતોની રજુઆત

વિસનગરમાં જમીનની જંત્રીના દર વધારવા ખેડૂતોની રજુઆત

શહેરના વિકાસમા ખેડૂતોનુ મહત્વનુ યોગદાન

વિસનગરના ખેડુતોએ પોતાની જમીન સંપાદનમા આપી શહેરના વિકાસમા મહત્વનુ યોગદાન આપ્યુ છે. જમીનોની માર્કેટ વેલ્યુ વધી છે. પરંતુ અન્ય શહેરોની સરખામણીમાં જંત્રીના દર નહી વધતા ખેડુતો દ્વારા જમીનના જંત્રી દરમા વધારો કરવા માટે મુખ્યમંત્રી સમક્ષ રજુઆત કરવામાં આવતા ખાતાકીય હિલચાલ શરૂ થઈ છે.
વિસનગરના બાયપાસ હાઈવે માટે ટુંક સમયમાં જમીન સંપાદન માટેની કાર્યવાહી શરૂ થવાની શક્યતા છે. જેમા ઘણા ખેડુતોની જમીન સંપાદનમા જાય તેમ છે. ત્યારે વિસનગરના ખેડુતો દ્વારા મુખ્યમંત્રી, મહેસુલ મંત્રી, વિસનગર ધારાસભ્ય એવમ્‌ કેબીનેટ મંત્રી, જીલ્લા કલેક્ટર વિગેરે લાગતા વળગતા વિભાગોમા રજુઆતો કરવામાં આવી છે કે, વિસનગરની ખેતીની જમીનની જંત્રી અન્ય ગામોની સરખામણીએ ઘણી ઓછી છે. જમીનોની માર્કેટ વેલ્યુ વધી ગઈ છે પરંતુ છેલ્લે વર્ષ ૨૦૧૧થી જમીનના જંત્રીના દરમા વધારો થયો નથી. શહેરના ખેડુતોએ વિસનગર મહેસાણા રોડ, વિસનગર વિજાપુર રોડ, વિસનગર વડનગર રોડ જેવા મોટા હાઈવે માટે કિમતી ફળદ્રુપ જમીન ગુજરાત સરકારને હસ્તક કરી છે. આ સીવાય વિકાસને લગતા અન્ય હેતુ માટે પણ જમીનો આપી છે. આ ખેતરની જમીન વડીલોપાર્જીત મળી છે. જે પરિવારની આજીવીકાનુ મુખ્ય સાધન છે. વિકાસ માટે જમીન સંપાદન થતા હાલની જંત્રીની કિંમત ખુબજ ઓછી હોવાથી ખુબજ ઓછી કિંમત આંકવામાં આવે છે. જેના કારણે ખેડુતોને ખુબજ મોટુ આર્થિક નુકશાન થાય તેમ છે.

છેલ્લા ૧૧ વર્ષમા દરેક ક્ષેત્રે ભાવ વધારો થયો છે ત્યારે વર્ષ ૨૦૧૧ પછી જંત્રીના દરમા વધારો થયો નથી

જમીન સંપાદનમા આપવાથી ઘણા ખેડુતો જમીન વિહોણા બની ગયા છે. અને ભવિષ્યમા પણ જમીન સંપાદનના કારણે બીજા ઘણા ખેડુતો જમીન વિહોણા થાય તેમ છે. જમીન એ ખેડુતોની ભાવિ પેઢી માટે આજીવીકા છે અને સંપતી છે. જમીન સંપાદનનો કોઈ વિરોધ નથી. પરંતુ જમીનની જંત્રીના દરમા વધારો થાય તો ખેડુતોની આજીવીકામા કોઈ તકલીફ પડે નહી. જમીનના ભાવ વધ્યા છે. વેપાર ધંધા માટે બિલ્ડરો તેમજ ઉદ્યોગપતીઓ દ્વારા જમીન ખરીદવામાં આવે છે. આવા સંજોગોમાં સરકાર દ્વારા નિર્ધારીત કરવામા આવેલ જંત્રી દર ઓછો હોવાના કારણે સરકારને રેવન્યુમા પણ મોટુ નુકશાન થઈ રહ્યુ છે. સરકાર દ્વારા સ્થળ સ્થિતિનુ નિરિક્ષણ કરી મહેસુલ વિભાગના તા.૩૧-૩-૨૦૧૧ના ઠરાવ મુજબ નવી જંત્રી નક્કી કરવા તાત્કાલીક કાર્યવાહી કરવા ખેડુતો દ્વારા વિનંતી કરવામાં આવી છે.
વિસનગર પાલિકાના પુર્વ કોર્પોરેટર ફુલચંદભાઈ બાબુલાલ પટેલ તથા અન્ય ખેડુતો દ્વારા કરવામા આવેલી રજુઆતના પગલે ખાતાકીય હિલચાલ શરૂ થઈ છે. મુખ્યમંત્રી ભુપેન્દ્રભાઈ પટેલ જંત્રી દર વધારવાની રજુઆત ચકાસીને નિયમાનુસારની કાર્યવાહી કરવા અધિક મુખ્ય સચિવ મહેસુલ વિભાગ ગાંધીનગરને જાણ કરવામાં આવી છે. જ્યારે જીલ્લા કલેક્ટરે નાયબ કલેક્ટર સ્ટેમ્પ ડ્યુટી મુલ્યાંકન તંત્ર મહેસાણાને પત્ર લખી અરજદારની રજુઆત અન્વયે જંત્રીના ભાવ વધારવા બાબતે ઘટતી કાર્યવાહી કરવા જાણ કરી છે.